Disg wedi llithro

Postiwyd ar 7 Medi 2005 gan dafydd

Os ydych chi’n gweinyddu systemau yn ddigon hir, rydych chi’n datblygu rhyw gysylltiad telepathig gyda’r peiriannau. Os yw peiriant yn crashio neu yn stopio gweithio’n gywir am ryw reswm, mi fyddai’n teimlo’n anhapus iawn tan i fi drwsio’r broblem. Pan godes i bore ma ro’n i’n teimlo ychydig yn dost – dim byd i’n atal i rhag mynd i’r gwaith ond digon i fi feddwl dwywaith.

Dwi’n edrych ar fy ebost yn y bore bob tro rhag ofn fod unrhyw neges bwysig, i’w ddelio gyda fe ar frys. A’n wir roedd ebost o gydweithiwr yn dweud fod un gweinydd yn ‘sâl’. Roedd y gweinydd gwe yn dal i weithio heb ddim byd amlwg o’i le ond roedd hi’n amhosib cysylltu a’r gweinydd.

Roedd gen i ryw syniad beth oedd y broblem falle – mae’r rheolwr disg ar y peiriant yma wedi ‘cloi’ unwaith o’r blaen. Gan fod y gweinydd yn defnyddio pâr o ddisgiau mewn system RAID, mae popeth dal i weithio os yw un disg yn marw. Ond nid disg marw oedd hwn ond y rheolwr ei hunan, felly roedd angen ail-ddechrau’r peiriant.

Ar ôl ebostio’r cwmni yn Llundain sy’n gofalu am y rhwydwaith, fe wnaethon nhw ail-ddechrau’r peiriant ond heb lwc. Doeddwn i ddim yn ffansio trip i Lundain i drwsio’r peth felly ces i afael ar beiriannydd yn Telehouse, wnaeth eistedd o flaen y peiriant gyda allweddell a monitor a wnes i siarad y boi trwy’r camau i gael y gweinydd nôl ar ei draed.

10 munud yn ddiweddarach roedd y gweinydd yn well a fe o’n i’n teimlo’n llawer gwell hefyd.

Postiwyd yn Gwaith | Sylwadau wedi eu Diffodd ar Disg wedi llithro

Rhithfro’n fyw

Postiwyd ar 5 Medi 2005 gan dafydd

Mae’r Rhithfro yn fyw.. hwre. Dwi wedi ychwanegu darn ar y dde sy’n dangos dolen i un gwefan ar hap allan o’r rhai sydd wedi eu cofrestru yn y Rhithfro.

Postiwyd yn Rhithfro | 1 Sylw

Geirfa/Vocab

Postiwyd ar 31 Awst 2005 gan dafydd

Mae Bwrdd yr Iaith wedi ychwanegu teclyn Vocab BBC Cymru i’w gwefan heddiw. (yr un cynta yn allanol i wneud hynny?)

Mae angen ystyried ymhellach sut y mae hyn yn cael ei gynnwys o fewn gwefan yn y ffordd mwya effeithiol, yn enwedig lleoliad y panel mewn gwefannau sydd wedi eu dylunio’n barod. Oherwydd y dull mae Vocab yn defnyddio i brosesu’r dudalen mae e hefyd yn torri rhai nodweddion o fewn y wefan – adrannau deinamig sy’n pasio gwybodaeth drwy ffurflenni HTML neu sy’n dibynnu ar wybod y cyfeiriad (URL).

Felly mae yna cryn dipyn i’w ddysgu wrth ei ddefnyddio gyda gwefannau deinamig, cymleth ac efallai edrych ar ddulliau arall o osod y dechnoleg o fewn gwefan.

Postiwyd yn Gwaith, Y We | Sylwadau wedi eu Diffodd ar Geirfa/Vocab

Rhegi

Postiwyd ar 31 Awst 2005 gan dafydd

Tra’n syrffio Technorati, des i ar draws cofnod gan girl_virgo yn adrodd hanes ei ymchwil i’r enw Dinbych-y-Pysgod a’i darganfyddiad o wefan Insultmonger.

Dwi ddim wedi cysylltu i’r wefan am fod e’n trio gosod pob math o gachu ar eich cyfrifiadur ond nifer o’r cofnodion Cymraeg wedi ei sgyfieithu e.e. “Sugno fy nhi’n i cachwr” – wel mae na enw am hynny ond wnai ddim ei sgrifennu yma. Mae yna rai eraill eitha doniol fel “Bronnau fel bryniau Eryri” ond mae rhan fwyaf yn gyfieithiadau o slang Americanaidd.

Ta beth, dwi wedi gadael neges iddi i dynnu’i sylw at fodolaeth y Rhegiadur.

Postiwyd yn Blogiau, Y We | 1 Sylw

Taith i Pluto

Postiwyd ar 29 Awst 2005 gan dafydd

Flwyddyn nesa, fe fydd NASA yn danfon chwiledydd ‘New Horizons‘ i blaned Pluto (dwi ddim yn hoff iawn o’r bathiad Cymraeg – Plwton, sy’n swnio fel gronyn bach fel electron neu broton). Dyma fydd y siawns cynta erioed i gael golwg iawn ar y blaned bell.

Mi fydd NASA yn cynnwys rhestr o enwau ar y llong, sydd yn ffordd dda o godi diddordeb yn y prosiect fydd yn cymryd 10 mlynedd hir i gyrraedd Pluto – ychwanegwch eich enw!

Postiwyd yn Y Gofod | 1 Sylw