Lwc y Cymry

Postiwyd ar 26 Hydref 2005 gan dafydd

Roedd erthygl ddoe yn y Guardian lle roedd ymchwil yn dangos fod pobl cafodd eu geni ym mis Mai yn credu eu bod yn fwy lwcus. Y syniad dwi’n credu yw fod rhai pobl yn dueddol o bwysleisio bethau ‘da’ sy’n digwydd a fod hynny yn atgyfnerthu’r syniad o fod yn lwcus.

Fel un gafodd ei eni ym mis Mai, rhaid dweud mod i’n cytuno ar y cyfan – dwi’n berson optimistig ac yn dueddol o weld y gorau o bopeth. A dwi’n gweithio gyda pesimist mwya’r byd (a gafodd ei eni ym mis Rhagfyr).

Ar ben hynny, fe wnaeth ymchwil Yr Athro Richard Wiseman ddarganfod fod y Cymry yn fwy lwcus na phawb arall ym Mhrydain (wel mi roedden ni’n gwybod hynny yn barod). Mae llawer o’r ymchwil ar gael yn y llyfr The Luck Factor (yn anffodus mae’r profion ar y wefan honno wedi torri).

Postiwyd yn Bywyd, Newyddion | 2 Sylw

Podledu

Postiwyd ar 25 Hydref 2005 gan dafydd

Newydd fod yn gweithio ychydig ar wefan Podledu a ysgrifennu tudalen ar gyfer Radio Amgen – tra’n gwneud bach o ymchwil wnes i ddarganfod blog Graffiti Cymraeg sy’n cynnwys podlediad. Ddim cweit y podlediad Cymraeg cyntaf ond beth yw ychydig ddyddiadau rhwng ffrindiau?

Fel mae’r blog yn esbonio, er mai Cymraeg yw iaith y cyflwyniad, cerddoriaeth saesneg ‘podsaff’ sy’n cael ei chwarae yn y sioe ar hyn o bryd – ond dyma’r amrywiaeth iach sy’n bosib ei gael yn y cyfrwng yma.

Gobeithio bydd fwy i glywed gan Rhys yn fuan.

Postiwyd yn Blogiau, Cerddoriaeth | Sylwadau wedi eu Diffodd ar Podledu

Arwyddion Cymraeg

Postiwyd ar 20 Hydref 2005 gan dafydd

Newydd gael sbam gan gwmni o Pontypŵl yn hysbysebu arwyddion dwyieithog. Mi fase nhw wedi gwneud fwy o argraff petai’r ebost a’r wefan yn ddwyieithog. Ond neges Saesneg ydoedd (nodwch y gwallau)

I would like to introduce you to our new business.
If you require Welsh and Englisg Bilingual Signage for your
business or organisation then you may find the sign you require on
our website or you can receice our FULL catalogue via e-mail.

Nawr os oedd cwmni ar gael oedd yn gallu cynhyrchu arwyddion dwyieithog o bob math, gan sicrhau safon uchel o gyfieithu mi fydde hyn yn beth da iawn, i osgoi y broblem Scymraeg. Mae’r enghreifftiau o arwyddion ar eu gwefan yn eitha da – er fod y gair CYMRAEG wedi ei blastro ar draws y fersiwn Cymraeg am ryw reswm – mae’r cyfieithiadau i’w gweld yn gywir er fod ambell i wall yno.

Ond lle mae’r wefan Gymraeg (heb sôn am y techneg ofnadwy o ddefnyddio ffeiliau graffeg i greu tudalennau)?

Postiwyd yn Cymraeg, Y We | 2 Sylw

Gwrando ar Grindell

Postiwyd ar 14 Hydref 2005 gan dafydd

Dwi am fynd nôl i 1993 gyda tri trac gan ‘swynwr y synthau’ (y Rick Wakeman Cymraeg)… ie, John Grindell. Wnaeth e ryddhau caset ar label Sain y flwyddyn honno o’r enw Celt (C2066a) sydd yn gampwaith o chwarae synth prog-rocaidd. Yndi mae’n gawslyd ac yn anffasiynol ond dyna pam dwi’n ei hoffi. Mae yna rywbeth arbennig am lais John hefyd sydd yn gyfuniad perffaith gyda’r synth.

Mae nodiadau defnyddiol ar y clawr felly sdim rhaid i fi wneud dim – mae’r gân gyntaf Dianc yn “gân yn sôn am y pwysau ar y Cymry sy wedi’i osod arnom gan y Saeson a’r Saesneg… mae’r straen weithiau’n mynd yn ormod.. ac mae’n hawdd meddwl am ddianc yn lle wynebu’r problemau”

Yr ail gân (yma nid ar y caset) yw Y Teithiwr ’93 (vocoder ahoi) – “cân ysgafn… yn sôn am ddyn sy’n gofyn i ferch ymuno â fo yn ei long ofod a theithio trwy’r bydysawd“. Ffar owt..

Y drydedd yw’r gân wych Yr Ynys sy’n para am 13 munud (ond dim ond 4 munud dwi wedi ei roi yma) – “mae’r gân gonsept hon yn dangos dyheadau’r cyfansoddwr am ddyddiad roc progresif y saithdegau”

      Dianc
[6.11MB]
      Y Teithiwr '93
 [4.58MB]
      Yr Ynys
 [5.59MB]

Postiwyd yn Cerddoriaeth, MP3 | 3 Sylw

Dewis enw i blentyn

Postiwyd ar 13 Hydref 2005 gan dafydd

Dyma stori wir sy’n gwneud ei ffordd drwy gylch clecs athrawon Cymraeg Caerdydd.

Daeth teulu i fyw yng Nghaerdydd gyda’r cyfenw ‘Dan’ (wedi’i ynganu fel daan mae’n debyg). Does gen i ddim syniad o le ddaeth y teulu na dim am ei cefndir, ond dim ots. Nid siaradwyr Cymraeg ydynt ond fe wnaethon nhw benderfynu rhoi enw Cymraeg i’w plant a’i danfon i ysgolion Cymraeg.

Tra’n siopa mewn archfarchnad rhai blynyddoedd yn ôl, pan oeddent yn disgwyl eu plentyn cynta, fe wnaethon nhw weld arwydd Cymraeg ar y wal. Pan anwyd y baban, fe gofiodd y cwpl am yr arwydd gan ystyried ei fod yn enw perffaith i’r plentyn. A dyna sut y cafodd y ferch ei henwi’n Allanfa Dan.

Erbyn hyn mae’n debyg fod y rhieni wedi newid enw’r plentyn i osgoi embaras – ydyn, mae nhw wedi newid y cyfenw i Darn, sydd yn llawer mwy synhwyrol.

Postiwyd yn Bywyd, Hwyl | Sylwadau wedi eu Diffodd ar Dewis enw i blentyn