Dreigiau Cymru

Postiwyd ar 4 Ebrill 2006 gan dafydd

Mae rhai aelodau o’r Cynulliad wedi bod yn grwgnach, yn ei modd arferol am ail-frandio y WDA a’r Bwrdd Croeso gyda logo newydd. Mae’n amlwg nad yw’r gwleidyddion yma yn deall rhwng brand a logo. Mae brand yn cwmpasu y ‘neges’ a’r syniadau sy’n cael ei cyfleu gan y cynnyrch – sef Cymru yn yr achos yma; fel gwlad, rhywle i wneud busnes a fel cyrchfan gwyliau.

Nid y logo sy’n cyfleu hynny ond y ddelwedd o’r cynnyrch sy’n cael ei werthu drwy ddeunydd marchnata, a thrwy profiad pobl sy’n ymweld a Chymru am fusnes neu pleser. Mae logo yn bwysig fel symbol i ddal sylw ond nid gwerthu tiniau Coke yw’r pwrpas, ond delwedd ac adnabyddiaeth. I ddweud y gwir, wrth werthu gwlad a diwylliant, rhan fach o’r ateb yw logo – mae pobl yn llawer mwy tebygol o gofio ac ymateb i ddelweddau o dirlun, adeiladau a phobl.

Mae Mike German wedi cwyno am “logo draig arall eto”. A mae Nick Bourne yn dweud fod y ddelwedd yn ystrydebol cyn mynd ymlaen i ddweud “if it’s not, broke don’t fix it” sydd ychydig yn gymysglyd a dweud y lleia. Mae’n amlwg nad oedd defnydd o ddraig mewn logo wedi ‘torri’ a felly dyw hi ddim wedi ei ‘trwsio’.

Dreigiau haniaethol oedd logos y WDA a’r Bwrdd Croeso a mae yna ddau arall yn logo y Cynulliad a’r Llywodraeth. Dwi’n deall felly – roedd hi’n iawn i’r WDA a’r Bwrdd Croeso ddefnyddio logo draig jyst am ei fod felna erioed, ond dyw hi ddim yn iawn ail-ddylunio’r ddau logo a’i cyfuno (sy’n arbed arian yn y pendraw). Dwi ddim yn cofio’r gwleidyddion yn cwyno pan wnaeth y WDA wario (wastio) £160,000 er mwyn i gwmni o Lundain newid ei logo o un draig i… ddraig arall gyda lliw ychydig bach yn wahanol!
WDA logo loco

Postiwyd yn Gwleidyddiaeth, Newyddion | Sylwadau wedi eu Diffodd ar Dreigiau Cymru

Telex

Postiwyd ar 3 Ebrill 2006 gan dafydd

Telex.. hen ddyfais gyfathrebu oedd yn gymysgedd o ebost a ffacs – mi roeddech chi’n teipio’ch neges ar bysellfwrdd a roedd y testun yn cael ei ddanfon drwy’r rhwydwaith ffôn i argraffydd ar y pen arall. Ta waeth, mae e hefyd yn enw ar un o arloeswyr electro-pop y ganrif ddwetha’. Meddyliwch am Kraftwerk gyda hiwmor sy’n llai sych a difrifol.

Un o’i senglau mwya’ oedd Moskow Diskow a mae gen i frith gof o weld ei perfformiad hynod ar gystadleuaeth yr Eurovision yn 1980. Wnaethon nhw ryddhau 5 albwm cyn ‘gorffwys’ yn 1986.

Wel mae’r band o wlad Belg nôl gyda albwm newydd, sydd yn gymysgedd o electronica gyda dylanwadau o gerddoriaeth dawns mwy diweddar. Gwrandewch ar glipiau o’r caneuon newydd a phodlediad difyr ganddynt.

Postiwyd yn Cerddoriaeth | 2 Sylw

Gwefan Llywodraeth y Cynulliad

Postiwyd ar 3 Ebrill 2006 gan dafydd

Mae gwefan newydd llywodraeth y Cynulliad yn fyw o’r diwedd, sydd am y tro cynta yn gwahaniaethu’n glir rhwng y Cynulliad fel sefydliad a’r llywodraeth. Mae’n well na’r hen un yn sicr ond beth sydd tu ôl y llenni?

Mae’n amlwg fod ymgais wedi bod i ddefnyddio’r dechnoleg ddiweddara gyda XHTML a CSS llawn, ond dyw’r cod ddim yn gwirio (un camgymeriad bach i ddweud y gwir). Mae yna fotwm RSS ar y wefan.. grêt! O, dyw e ddim yn gweithio..

Latest News And Events http://localhost:8080/

Dy’n nhw ddim wedi trefnu y dewislenni yn synhwyrol iawn – mae rhai adrannau newyddion yn dangos teitlau (hir) y storïau newyddion yn y ddewislen ar y chwith, sydd ddim yn gyfeillgar iawn. Mae enghreifftiau o Gymraeg Crap dros y wefan i gyd – cwis i chi, nodwch faint o gyfieithiadau chwithig, camgymeriadau teipio a sillafu yn y dudalen yma, er enghraifft. O ddarllen rhai o’r tudalennau mae’n debyg nad ydyn nhw wedi trafferthu defnyddio y termau safonol nac ychwaith cronfa terminoleg y Cynulliad ei hunain.

Mae’n debyg mai BBC Gogledd Iwerddon sy’n gyfrifol am peth o’r gwaith yma, os nad y cyfan. Defnydd da iawn o dalent cynhenid Gymreig unwaith eto…

Postiwyd yn Gwleidyddiaeth, Y We | 1 Sylw

Cwangos – gêm drosodd

Postiwyd ar 31 Mawrth 2006 gan dafydd

Yfory fe fydd nifer o gwangos yng Nghymru yn dod i ben a felly fe fydd eu gwefannau hefyd yn cau lawr a dod yn rhan o wefan fonolithig y Cynulliad. Yn y tymor byr mi fydd hyn yn golygu y bydd y gwefannau defnyddiol yma yn cael eu llyncu o fewn gwefan anghyfeillgar ac annealladwy cymru.gov.uk.

Ar y cyfan mae gwefannau y cwangos wedi cael eu dylunio a’u cynnal gan gwmnïau bach sydd a’r sgiliau addas ar gyfer creu gwefannau hawdd eu defnyddio, hygyrch a mewn ffordd hynod gost-effeithiol. Tra fod gwefan y Cynulliad yn gymysgedd o waith dylunio gan gwmni allanol wedi ei gyfuno gyda system rheoli cynnwys mewnol – fel rhan o gontract drud iawn gyda un o’r cwmnïau TG mawr.

Ar hyn o bryd mae contract gwerth o leia £600,000 yn cael ei hysbysebu ar gyfer gwefan newydd y Cynulliad fydd yn ymgorffori yr holl adrannau newydd yma, felly gobeithio fyddan nhw’n gwneud y dewis iawn i greu gwefan cynhwysfawr newydd fydd yn hawdd i’w ddefnyddio, i’w chwilio a’i lywio. Mae rhai o’r cwangos wedi treulio blynyddoedd yn creu ei gwefannau eu hunain, casglu gwybodaeth at ei gilydd a dysgu sut i gyflwyno gwybodaeth yn y ffordd mwya effeithiol ar gyfer ei arbenigedd nhw. Gobeithio na fydd y profiad yma yn cael ei golli wrth ymuno a llywodraeth y Cynulliad.

Ar Ebrill 1af, mi fydd y gwefannau canlynol yn diflannu neu ei ail-gyfeirio i dudalennau o fewn cymru.gov.uk:

  • WDA – mae’n debyg na fydd holl gynnwys y wefan yma yn gallu cael ei drosglwyddo i’r wefan arall, felly mi fydd cynnwys y wefan dal ar gael, drwy gyfeiriad arall.
  • Proffesiynau Iechyd Cymru – mae esboniad mewn Cymraeg chwithig yno’n barod.
  • ELWa – mi fydd hwn yn ail-gyfeirio i dudalennau o fewn wales.gov.uk
  • ACCAC – mi fydd hwn yn ail-gyfeirio i adran Addysg a Sgiliau o fewn wales.gov.uk ond mi fydd yr holl gynnwys yn yr hen wefan ar gael am beth amser eto
  • Bwrdd Croeso Cymru – mi fydd hwn yn cyfeirio at wales.gov.uk (Wps mae nhw wedi gwneud yn barod cyn hanner nôs a dyw’r wefan ‘newydd.cymru.gov.uk’ ddim ar gael i’r byd eto)

Mae’n bosib fydd y cyfeiriad ‘newydd.cymru.gov.uk’ yn dod yn fyw am hanner nos yn union ond dwi’n amau rhywsut. Gewn ni weld..

Postiwyd yn Newyddion, Y We | 4 Sylw

Diwedd R-bennig?

Postiwyd ar 28 Mawrth 2006 gan dafydd

Yn ôl eu gwefan, mae Recordiau R-bennig o Fôn wedi dod i ben ar ôl 15 mlynedd o ryddhau recordiau gwahanol ac unigryw. Fe ddes i ar draws y label gynta tua 1990 neu 1991 pan glywes i record A5 ‘Gadael/Colli Mynadd‘ yn cael ei chwarae ar sioe Nia Melville ar Radio Cymru. Ac o hynny ymlaen fe ddes i yn ffan pennaf o’r label a wnes i ymgais (aflwyddiannus) i gasglu unrhywbeth yr oedden nhw’n cyhoeddi.

Profiad rhyfedd oedd cysylltu gyda Johnny R, perchennog y label, yn y dyddiau cynnar. Fe wnes i ddanfon arian yn gofyn am gopi o rhyw record (7″ Amser y Mis efallai) ynghyd a llythyr gwirion (fel bachgen ychydig yn ‘wahanol’ yn fy arddegau gyda lot o bethau rhyfedd yn mynd ymlaen yn fy meddwl). Ychydig ddiwrnodau yn ddiweddarach fe ges i’r pres yn ôl, dim record ond llythyr yn cynnwys rant hir – roedd Johnny yn fy nghyhuddo o fod yn ‘sbei’ o gwmni Cytgord. (Paranoia Cefn Gwlad)

A Sbei fues i o hynny ymlaen wrth i mi lythyru gyda’r dyn hynod yma o Walchmai a danfon fy ymgeision pitw i gynhyrchu cerddoriaeth arbrofol efo dim byd mwy na samplyr 8-bit a chwaraewr casét.

Mwy o atgofion nes ymlaen efallai – dim ond gobeithio y byddwn ni’n clywed eto gan Mr. R (a nid jyst ar y blog yma!) yn y dyfodol.

Postiwyd yn Cerddoriaeth, Y We | 4 Sylw