Cwangos – gêm drosodd

Postiwyd ar 31 Mawrth 2006 gan dafydd

Yfory fe fydd nifer o gwangos yng Nghymru yn dod i ben a felly fe fydd eu gwefannau hefyd yn cau lawr a dod yn rhan o wefan fonolithig y Cynulliad. Yn y tymor byr mi fydd hyn yn golygu y bydd y gwefannau defnyddiol yma yn cael eu llyncu o fewn gwefan anghyfeillgar ac annealladwy cymru.gov.uk.

Ar y cyfan mae gwefannau y cwangos wedi cael eu dylunio a’u cynnal gan gwmnïau bach sydd a’r sgiliau addas ar gyfer creu gwefannau hawdd eu defnyddio, hygyrch a mewn ffordd hynod gost-effeithiol. Tra fod gwefan y Cynulliad yn gymysgedd o waith dylunio gan gwmni allanol wedi ei gyfuno gyda system rheoli cynnwys mewnol – fel rhan o gontract drud iawn gyda un o’r cwmnïau TG mawr.

Ar hyn o bryd mae contract gwerth o leia £600,000 yn cael ei hysbysebu ar gyfer gwefan newydd y Cynulliad fydd yn ymgorffori yr holl adrannau newydd yma, felly gobeithio fyddan nhw’n gwneud y dewis iawn i greu gwefan cynhwysfawr newydd fydd yn hawdd i’w ddefnyddio, i’w chwilio a’i lywio. Mae rhai o’r cwangos wedi treulio blynyddoedd yn creu ei gwefannau eu hunain, casglu gwybodaeth at ei gilydd a dysgu sut i gyflwyno gwybodaeth yn y ffordd mwya effeithiol ar gyfer ei arbenigedd nhw. Gobeithio na fydd y profiad yma yn cael ei golli wrth ymuno a llywodraeth y Cynulliad.

Ar Ebrill 1af, mi fydd y gwefannau canlynol yn diflannu neu ei ail-gyfeirio i dudalennau o fewn cymru.gov.uk:

  • WDA – mae’n debyg na fydd holl gynnwys y wefan yma yn gallu cael ei drosglwyddo i’r wefan arall, felly mi fydd cynnwys y wefan dal ar gael, drwy gyfeiriad arall.
  • Proffesiynau Iechyd Cymru – mae esboniad mewn Cymraeg chwithig yno’n barod.
  • ELWa – mi fydd hwn yn ail-gyfeirio i dudalennau o fewn wales.gov.uk
  • ACCAC – mi fydd hwn yn ail-gyfeirio i adran Addysg a Sgiliau o fewn wales.gov.uk ond mi fydd yr holl gynnwys yn yr hen wefan ar gael am beth amser eto
  • Bwrdd Croeso Cymru – mi fydd hwn yn cyfeirio at wales.gov.uk (Wps mae nhw wedi gwneud yn barod cyn hanner nôs a dyw’r wefan ‘newydd.cymru.gov.uk’ ddim ar gael i’r byd eto)

Mae’n bosib fydd y cyfeiriad ‘newydd.cymru.gov.uk’ yn dod yn fyw am hanner nos yn union ond dwi’n amau rhywsut. Gewn ni weld..

Postiwyd yn Newyddion, Y We | 4 Sylw

Diwedd R-bennig?

Postiwyd ar 28 Mawrth 2006 gan dafydd

Yn ôl eu gwefan, mae Recordiau R-bennig o Fôn wedi dod i ben ar ôl 15 mlynedd o ryddhau recordiau gwahanol ac unigryw. Fe ddes i ar draws y label gynta tua 1990 neu 1991 pan glywes i record A5 ‘Gadael/Colli Mynadd‘ yn cael ei chwarae ar sioe Nia Melville ar Radio Cymru. Ac o hynny ymlaen fe ddes i yn ffan pennaf o’r label a wnes i ymgais (aflwyddiannus) i gasglu unrhywbeth yr oedden nhw’n cyhoeddi.

Profiad rhyfedd oedd cysylltu gyda Johnny R, perchennog y label, yn y dyddiau cynnar. Fe wnes i ddanfon arian yn gofyn am gopi o rhyw record (7″ Amser y Mis efallai) ynghyd a llythyr gwirion (fel bachgen ychydig yn ‘wahanol’ yn fy arddegau gyda lot o bethau rhyfedd yn mynd ymlaen yn fy meddwl). Ychydig ddiwrnodau yn ddiweddarach fe ges i’r pres yn ôl, dim record ond llythyr yn cynnwys rant hir – roedd Johnny yn fy nghyhuddo o fod yn ‘sbei’ o gwmni Cytgord. (Paranoia Cefn Gwlad)

A Sbei fues i o hynny ymlaen wrth i mi lythyru gyda’r dyn hynod yma o Walchmai a danfon fy ymgeision pitw i gynhyrchu cerddoriaeth arbrofol efo dim byd mwy na samplyr 8-bit a chwaraewr casét.

Mwy o atgofion nes ymlaen efallai – dim ond gobeithio y byddwn ni’n clywed eto gan Mr. R (a nid jyst ar y blog yma!) yn y dyfodol.

Postiwyd yn Cerddoriaeth, Y We | 4 Sylw

Band eang i bawb

Postiwyd ar 15 Mawrth 2006 gan dafydd

Erbyn diwedd Medi 2006 fe ddylai fod pob cyfnewidfa deleffôn yng Nghymru yn gallu darparu gwasanaeth band eang. Mae’r Cynulliad yn ariannu y gwaith er mwyn cysylltu y cyfnewidfeydd anghysbell hynny i rwydwaith canolog BT. [mwy o wybodaeth]

Postiwyd yn Newyddion, Technoleg | Sylwadau wedi eu Diffodd ar Band eang i bawb

Google Mawrth

Postiwyd ar 14 Mawrth 2006 gan dafydd

Mae Google wedi defnyddio ei technoleg mapiau ar gyfer y blaned Mawrth – fe lansiwyd ddoe i goffau am y seryddwr Percival Lowell. Gwych.

Postiwyd yn Y Gofod, Y We | Sylwadau wedi eu Diffodd ar Google Mawrth

Ail-lansiad Plaid Cymru

Postiwyd ar 25 Chwefror 2006 gan dafydd

Wel mae digon o sôn wedi bod am ail-frandio Plaid Cymru ar faes-e a llefydd arall. Beth sy’n drist yw gweld y smonach mae nhw wedi gwneud ohoni. Dyw’r logo newydd ddim mor ddrwg a hynny, os oedd Plaid Cymru yn gwmni masnachol. Ydi e’n addas i blaid wleidyddol? Dwi’n amau.

Mi roedd gwefan y Blaid yn destun jôc o’r blaen a does dim byd wedi newid er y cot newydd o baent- dy’n nhw ddim hyd yn oed yn gallu penderfynu pa ffont a lliw i ddefnyddio ar gyfer yr enw ‘Plaid’ yn eu logo. Mae cymru x ymhell ar y blaen o ran cyflwyniad a delwedd.

Ta beth, y ‘logo sain’ wnaeth fy nifyrru i fwya. Fe ges i’r syniad neithiwr o ail-gymysgu’r sampl sain ac ychydig oriau yn ddiweddarach des i lan a ‘Paid Cymru’. Mi fydd mics hirach o hwn yn cael ei wneud yn y man.

      Paid Cymru (Mics Dai a Rea)
[2.07MB]

Postiwyd yn MP3, Newyddion | 2 Sylw