Os ydych chi’n hwyr yn paratoi eich cardiau nadolig flwyddyn yma, beth am brynu rhai sydd wedi ei ailgylchu o faw defaid. Mae cwmni o Wynedd yn gwerthu cynnyrch (dim gwefan Gymraeg eto) sydd yn gwneud defnydd newydd o’r gwastraff yma. Yr unig beth sy’n poeni fi yw – onid yw baw defaid ac anifeiliaid eraill yn rhan o broses naturiol a hanfodol o roi gwrtaith yn ôl i’r pridd, yn enwedig ar dir mynydd?
Radio curiad
Dwi wedi bod yn arbrofi gyda darlledu ar-lein. Fel cam cyntaf dwi wedi agor gorsaf radio 24/7 i gerddoriaeth Cymraeg. Mae gen i gasgliad o mp3s Cymraeg wedi ei llwytho lawr o wefannau bandiau, rhai clasuron a rhai diweddar iawn. Wedyn wnes i wneud ‘rhestr chwarae’ o rhain i gyd – 8 awr a hanner i gyd. Mae’r rhestr yma yn chwarae ar hap drwy’r amser. Dim DJs crap, dim siarad gwag, jyst cerddoriaeth amrywiol.
Os ydych chi’n gwrando ar hwn, a dechrau syrffedu ar yr un traciau yn dod lan o hyd, mi fydd rhaid i fi chwilio am fwy o ffeiliau i ychwanegu i’r llyfrgell. I wrando ar y ffrwd mae angen chwaraewr mp3 a agor y cyfeiriad yma – http://radio.curiad.org:8000/byw.m3u ynddo.
Dwi’n gwybod fod y meddalwedd yma yn gweithio: WinAMP, XMMS, Windows Media Player. Mae rhai yn well na’i gilydd am ddangos manylion y traciau sy’n chwarae ar hyn o bryd. Hoffwn i wybod os ydych chi’n llwyddo gwrando ar yr orsaf drwy unrhyw feddalwedd arall.
Postiwyd yn Cerddoriaeth, Radio, Rhithfro, Y We
14 Sylw
Gwefannau pleidiau gwleidyddol Cymru
Fel mae Rhys wedi nodi yn barod, roedd erthygl yn y Western Mule ddoe yn adolygu gwefan newydd Plaid Cymru a’i gymharu gyda’r prif bleidiau arall yng Nghymru.
Mae’n adolygiad annheg, anwybodus a chamarweiniol. Dwi am fanylu ymhellach ac yn faith am y mater.
Continue reading
Scarlets yn y coch
Mi rydych chi’n glwb rygbi mewn trafferthion ariannol – beth yw eich blaenoriaeth? Creu gwefan newydd wrth gwrs! Fe lansiwyd gwefan newydd y Scarlets wythnos diwethaf – mae’r cwmni a’i gynhyrchodd yn noddi’r Scarlets yn barod felly dwi’n amau fod hwn yn ffribi.
Felly dyma adolygiad o’r wefan newydd (ymwadiad: roeddwn i rywbeth i wneud a’r hen wefan, ond ddim y dylunio, nodweddion na’r gwaith technegol).
Continue reading
Chwiliad newydd Google
Mae Google wedi lansio gwasanaeth er mwyn creu chwiliad addasedig. Mae wedi bod yn bosib ers tipyn i ddefnyddio Google i wneud chwiliad o fewn eich gwefan eich hun, ond mae hwn yn cynnig mwy o reolaeth dros ba allweddeiriau a safloedd i’w cynnwys neu eu blaenoriaethu.
Dwi ddim yn gweld llawer o fantais eto o ran chwiliadau Cymraeg. Os ydych chi’n chwilio am eiriau Cymraeg neu enwau sy’n ymddangos yn niwylliant Cymraeg yn unig, mi fyddwch chi’n debygol o gael canlyniadau boddhaol o brif wefan Google. Mi allai’r gwasanaeth yma helpu ychydig drwy gyfyngu i set o wefannau Cymraeg o’n dewis ni. Dwi wedi arbrofi drwy greu chwiliad isod, sydd yn chwilio’r We i gyd ond yn rhoi fwy o bwyslais ar rai gwefannau Cymraeg dwi wedi nodi. Y broblem gyda hyn yw fod angen cynnal a chadw y rhestr er mwyn ei gadw’n ddefnyddiol, er mai prif bwrpas technoleg yw gwneud pethau’n haws ac yn fwy otomatig.