Dwi yn ailgylchu hen rhaglenni teledu eto, a mae gen i thema tro yma – ysgol Bro Myrddin. Daw’r clipiau cynta o raglen ‘Sgŵp’ o 1992. Roedd y rhaglen yn mynd i ysgol wahanol bob wythnos a rhoi’r cyfle i’r disgyblion gyflwyno pedwar stori o’i dewis nhw. Mae’r clip heddiw yn eitem ar y chwaraewr snwcer ifanc Matthew Stevens.
Sega sadwrn segur
Y Nadolig yma, mae chwaraewyr gêmau yn edrych ymlaen i chwarae ar gonsol newydd y ‘Wii’ gan Nintendo, sy’n cystadlu yn erbyn yr Xbox 360 (allan ers blwyddyn) a’r PS3 (allan ym mis Mawrth 2007, i fod).
Deng mlynedd yn ôl roedd brwydr tebyg rhwng cwmnïau Nintendo, Sony a Sega. Adeg Nadolig 1995, fe adolygwyd y Sega Saturn gan rhyw grwt ar Uned 5, sgwn i os y’ch chi’n ei nabod e?
Gwenwch ffrindiau newydd!
Mae erthygl ar Ping Wales yn sôn am wefan o’r enw ‘Motivating Mates’ gafodd ei greu gan unigolyn o Ferthyr Tudful. Mae’r wefan nawr wedi ei gyfieithu i’r Gymraeg, felly beth am gymryd cipolwg arno?
O na, baneri bach jac yr undeb er mwyn dewis iaith! Y brif neges ar y dudalen cartref yw “Gwenwch ffrindiau newydd… mae’n chychwyn yma!”. Nid y chychwyn gorau i fersiwn Gymraeg falle? Mae’r wefan i’w weld yn hyrwyddo syniad diddorol ond i feddwl fod cwmni proffesiynol wedi ei gyfieithu mae’n bosib y byddai gwasanaeth prawf-ddarllen y cwmni wedi bod yn ddefnyddiol cyn lansio.
Trafferthion teithio
Oherwydd y gwynt a glaw di-derfyn yn ddiweddar, mae e wedi bod yn ddigon anodd teithio ar drafnidiaeth cyhoeddus mewn rhannau o Gymru. Mae’r trênau o gwmpas Caerdydd wedi bod yn eitha annibynadwy – y diwrnod o’r blaen fe ganslwyd dau drên yn olynol, felly roedd rhaid cerdded lan Stryd Bute yn y glaw (ymarfer corff da falle ond ddim yn bleserus). Y dyddie yma, wrth gerdded drwy Caerdydd yn y tywyllwch gyda’r glaw yn tasgu oddi ar yr ymbarél, dwi’n hanner disgwyl tîm Torchwood i ruthro rownd y gornel ar drywydd ryw ddirgelwch arall.
Cyn i fy ffantasi gymryd drosodd, roedd pwynt i’r blogiad yma – sef nodi fod porthiant RSS Cymraeg gan y BBC o newyddion teithio Arriva Cymru. Alla’i ddim gweld hwn wedi ei hysbysebu unrhyw le, ddim yn y wefan Teithio na Travel News. Dangos y prif ddigwyddiadau mae hwn nid gwybodaeth am bob gorsaf ond mae’n fwy defnyddiol na ein hen ffrind, gwefan Arriva.
Ysgrifen ar y murmur
Flin am y teitl. Nodyn bach i roi dolen i flog newydd am dechnoleg iaith gan staff Canolfan Bedwyr, ‘na gyd.