Archifau Categori: Newyddion

Noson Gwylwyr S4C

Postiwyd ar gan

Mae yna lawer o drafodaeth ynglyn a dyfodol S4C yn mynd yn ei flaen ar hyn o bryd ond dwi’n credu fod peryg nawr o ddrysu dau fater wahanol, sef cyllido’r sianel a’i chynnwys.

Fe drefnwyd rhaglen arbennig ‘Noson Gwylwyr’ (sydd ymlaen heno) gan S4C ymhell cyn y cynlluniau presennol i gyllido S4C drwy’r drwydded teledu.

Mae ffynhonnell a maint cyllid y sianel yn fater gwleidyddol a mae angen trafodaeth ar wahan ar gyfer hynny, mewn cyd-destun ehangach a phenderfyniad ar bwy sy’n rheoli materion darlledu yng Nghymru. Dwi wedi ebostio S4C i ofyn iddyn nhw beidio trafod y cyllid heno neu o leia gyfyngu ar y drafodaeth hynny.

Beth sy’n bwysig i’r gwylwyr yw beth sydd yn ymddangos ar y sgrîn ac os oes rhaglenni atyniadol sy’n ddifyr a gafaelgar. Pwy bynnag sy’n ariannu S4C mi fydd toriadau yn digwydd beth bynnag a dwi’n sicr fod posib arbed arian mewn nifer o feysydd (mae nifer o fewn y diwydiant wedi sôn am y gwastraff arian sydd wedi bod dros y blynyddoedd).

Mae angen i’r sianel ail-edrych ar sut mae nhw’n comisiynu rhaglenni. Dwi’n credu fod comisiynwyr y sianel a rhai cynhyrchwyr wedi mynd yn ddiog a hunan-foddhaol. Mae hyn yn ddatblygiad naturiol mewn unrhyw gorff sydd yn fonopoli. Does gan S4C ddim cystadleuaeth na chymhelliad allanol i wasanaethu’r gynulleidfa yn well – efallai fod angen edrych am ffyrdd y gall syniadau am raglenni Cymraeg gael eu cynhyrchu tu allan i S4C.

Does dim rheswm o gwbl pam na allai’r Cynulliad ei hun ddechrau sianel deledu ei hunain (heblaw arian a’r cymhelliad gwleidyddol wrth gwrs). Mi fyddai’n ddrud darlledu sianel yn y ffordd draddodiadol (ar Freeview/Sky) ond mae digon o ffyrdd eraill i ddosbarthu cynnwys ar lein fyddai’n cyrraedd cynulleidfa byd-eang gyda mwy o wylwyr potensial na S4C. Does dim rhaid trio creu sianel llinol o 7am-12am, ond yn hytrach rhoi cyfle ysgrifennwyr, cyfarwyddwyr, perfformwyr a phobl greadigol eraill i arbrofi.

Un o fy hoff gyfresi yn y 90au oedd sioe ‘Adam & Joe’ a gafodd ei wneud ar gyllid bach iawn a’i ddarlledu mewn slot ‘arbrofol’ ar Channel 4. Roedd y gyfres yn dibynnu ar greadigrwydd dau unigolyn, syniadau gwych, golygu slic a dim byd mwy na hynny. Oes yna bobl yr un mor greadigol yng Nghymru? Dwi ddim yn gwybod – mae yna rai enghreifftiau prin iawn ar YouTube ond os oedd hi’n bosib rhoi cyngor, arweiniad ac ychydig bach o gymorth technegol mae’n bosib fydden ni’n gwybod yr ateb.

Beth bynnag, fe gawn ni weld heno os ydi S4C wir wedi ei ‘deall hi’ neu a fyddan nhw’n parhau yn yr un rhigol.

Cerdyn bws Iffy

Postiwyd ar gan

Mae cwmni Bws Caerdydd wedi lansio ‘cerdyn clyfar’ heddiw gyda’r enw amheus ‘iff’ (tudalen Iff ar eu gwefan saesneg yn unig).

Yn lle talu bob tro i fynd ar y bws mae’n bosib defnyddio’r cerdyn. Mae’n bosib llwytho’r cerdyn gyda arian o flaen llaw neu ar y bws, hyd at gyfanswm o 50 punt. ‘Does dim byd newydd iawn yn hyn – mi fydd llawer yn gyfarwydd a cherdyn Oyster yn Llundain a mae yna gynlluniau tebyg mewn nifer o ardaloedd yn Lloegr.

Y peth sy’n fy synnu i yw fod yn rhaid defnyddio arian ar y bws i ychwanegu at y credyd neu fynd i swyddfa Bws Caerdydd yn Wood Street. Dim sôn am dalu ar lein na system sy’n ychwanegu yn awtomatig fel sydd ar gerdyn Oyster. Mae’n debyg y bydd pobl sy’n talu am docyn tymor drwy ddebyd uniongyrchol yn cael credyd wedi ei ychwanegu i’r gerdyn ond ‘dyw hynny ddim gwerth i deithwyr achlysurol.

Yn y gwaith rydy’ ni wedi bod yn gweithio ar nifer o wefannau ‘top-up’ i gwmniau bysus o Loegr – yn wir mae’n rhan sylweddol o’n gwaith yn ddiweddar. ‘Dyw e ddim yn syml mae’n wir, a mae tipyn o gymlethdodau wedi codi yn ein gwaith ni. Er hyn, mae rheoli cyfrifon a thalu am bethau fel hyn ar lein yn nodwedd reit sylfaenol i unrhyw wasanaeth ers blynyddoedd maith.

Beth yw hi nawr.. bron yn 2011? Croeso i Gaerdydd.. dinas ar flaen y gad.

Brwydr y ffonau clyfar

Postiwyd ar gan

Mae gan y BBC stori heddiw am gynnydd sylweddol yng nghwerthiant ffonau HTC. Dwi wedi sylwi ar lawer o mwy o bobl yn defnyddio ffonau Android gan HTC, yn enwedig merched. Yn ein swyddfa ni, mae iPhone gan bedwar dyn, a’r HTC Desire gan dri menyw ag un dyn (ac un arall ar y ffordd).

Ar y trên hefyd dwi’n sylwi fwy o ferched yn defnyddio ffonau HTC. Oes patrwm yma? Dwi’n amau fod e rhywbeth i wneud a diwylliant ‘macho’ cwmni Apple. Mewn rhyw ffordd ryfedd mae nhw wedi cymryd drosodd o Microsoft fel ‘bwli’ y byd cyfrifiadurol. Mae personoliaeth y pennaeth Steve Jobs i’w wneud a hyn dwi’n siwr ond dwi’n credu fod y ffordd mae Apple yn marchnata hefyd yn apelio fwy at ddynion.

Wrth ryddhau cynnyrch newydd mae Apple yn creu ‘râs’ lle mae cyfrinachedd yn bwysig i ddechrau gyda leaks o wybodaeth tactegol. Mae hyn yn creu cystadleuaeth i gael y wybodaeth ddiweddaraf sy’n arwain at un diwrnod ‘mawr’ lle mae rhaid ymladd i fod y cynta yn y ciw i brynu’r teclyn newydd. Mae hyn yn apelio at gîcs a gîcs gwrywaidd yn sicr.

Heb fod yn rhy ystrydebol dwi’n credu fod merched yn hoffi cymharu wrth siopa a ddim mor frwd dros fod y cynta i’r felin, a bod yn early adopter. Mae yna ddigon o gîcs benywaidd hefyd a mae nhw hefyd yn edrych ar y specs a’r dechnoleg tu ôl i declyn, ond does sdim rhaid fod yn rhan o’r ‘râs’.

Dim ond damcaniaeth yw’r uchod, ond mi fyddai’n ddiddorol iawn gweld unrhyw ystadegau ar y defnydd o ffonau clyfar gan y ddau ryw.

Costau cyfieithu

Postiwyd ar gan

Mae yna rhywbeth yn drewi ynglyn a’r stori yma ynglŷn a chyfieithu gêm gyfrifiadurol. Dyw cyfieithu 30 mil o eiriau ddim yn mynd i gostio £16,500!

Mae’n debygol mai geiriau unigol fyddai llawer o’r cynnwys yn hytrach na brawddegau llawn a felly fe fyddai’n bosib cyfieithu y trwch o’r geiriau drwy eiriadur neu cof-gyfieithu. Hyd yn oed o ystyried y gwaith o wirio’r testun a’i roi yn y fformat cywir ar gyfer y gêm dyw’r gost ddim mwy na rhyw 2 neu 3 mil.

Mae rhywun yn trio cymryd mantais fan hyn – naill ai pwy bynnag sy wedi rhoi yr amcanbris, neu y cwmni gemau eisiau’r gwaith am ddim.

TAW piau hi

Postiwyd ar gan

Wel mae’r cwsmer cynta wedi bod ar y ffôn yn dweud “O na, mae’r cyfradd VAT yn newid, beth am ein siop ar lein?”, er does dim byd wedi ei gyhoeddi eto.

Dwi ddim yn gwybod os yw’r canghellor yn deall cweit faint o waith fydd angen i bobl newid eu systemau. Dyw’r gyfradd ddim wedi newid ers 1991, felly ychydig iawn o raglennwyr sydd wedi ystyried nad yw’r gyfradd dreth yn ‘gysonyn’ ond yn ‘newidyn’.

Gawn ni weld beth fydd y cyhoeddiad swyddogol ond dwi’n gallu gweld dipyn o ruthro prynhawn ‘ma i newid gwefannau i ddefnyddio’r cyfradd newydd. Fel mae’n digwydd mi fydd yn reit syml gwneud hyn ar gyfer y rhan fwyaf o wefannau gan fod y gyfradd yn cael ei storio mewn un man yn y cod. Mae nifer o’r gwefannau rydyn ni wedi adeiladu yn gorfod delio gyda trethi lleol yn America a mae cyfrifo hynny llawer mwy cymleth na unrhyw beth ym Mhrydain.

Dwi newydd wneud arolwg cyflym o’r gwefannau yn ein gofal ni a mi fydd angen newid tri ffigwr:

  • 17.5 -> 15
  • 1.175 -> 1.15
  • 7/47 -> 3/23 (dyma esboniad o’r ffracsiynau yma)