Rhaglen ddifyr iawn ar bump neithiwr gyda canlyniadau pôl wedi’i gynnal yn y Radio Times gyda’r darllenwyr yn enwebu y rhyfeddod naturiol gorau neu’r harddaf ym Mhrydain. Allan o’r deg uchaf roedd dau yng Nghymru (fe ddyle fod mwy, falle nad yw Pistyll Rhaeadr mor adnabyddus a hynny). Cwm Idwal yn 7fed, rhywle dwi’n nabod eitha da ar ôl gwneud fy mhrosiect Daearyddiaeth yno. A fe ddaeth Dan-yr-Ogof yn gyntaf – rhaid mynd lan yna eto, dwi heb fod yna ers mod i’n 6 neu 7 dwi’n siwr.
Diwrnod y Gweinyddwyr System
Wnaeth cyd-weithiwr ddod fyny ata’i bore ‘ma a dweud “Happy Sysadmin Day”. “Is it?” medde fi. Wel mae hi wedi dod rownd eto yn eitha cyflym. Dwi’n cael fy ngwerthfawrogi bob dydd, wrth gwrs…
Postiwyd yn Technoleg
Sylwadau wedi eu Diffodd ar Diwrnod y Gweinyddwyr System
Ffrancopop
Dwi wedi bod yn sycyr erioed am ganeuon pop ffrengig neu rwsieg. O’n i’n arfer tiwnio mewn i sianeli radio aneglur ar shortwave i wrando ar lleisiau a synau rhyfedd ac estron. Ar ôl darganfod sianel Ffrengig, un o’r caneuon cynta glywes i oedd ‘Voyage, Voyage’ gan Desireless. Aeth hynny ymlaen i ddeg uchaf siartiau Prydain yn 1988 – mae’r saeson yn ail-ddarganfod pop ffrengig bob hyn a hyn; dyna flwyddyn ‘Joe le Taxi’ hefyd.
Tra’n chwilio am wybodaeth am ‘Voyage, Voyage’ des i ar draws cover o’r gân wedi ei berfformio (yn Ffrangeg) gan gantores o Rwsia – Zamsha. Mae’r fersiwn yma yn codi’r bpm ac yn fwy techno-aidd, ddim mor rhamantaidd a’r gwreiddiol. Dwi’n cyflwyno’r ddau mp3 yma i chi:
Desireless - Voyage
(fersiwn 1988) [5.17 MB]
Zamsha - Voyage
[6.18 MB]
Postiwyd yn Cerddoriaeth, MP3
Sylwadau wedi eu Diffodd ar Ffrancopop
Enwau parth acennog
Ar hyn o bryd mae Nominet, y corff sy’n rheoli parth .uk, yn ymgynghori ar system IDN (Internationalised Domain Names) sef ffordd o ddefnyddio, ymysg pethau eraill, acenion o fewn enw parth. Er enghraifft mi fyddai’n bosib defnyddio dŵrcymru.co.uk – dim ond dwrcymru.co.uk sydd ar gael ar hyn o bryd.
Yn amlwg mae hyn yn bwysig i’r Gymraeg o fewn .uk – er nad ydw i am ddefnyddio parthau .uk yn bersonol – mae nifer o gwmniau Gymreig yn gwneud hynny. Mae nifer o’r atebion i’r ymgynghoriad hyd yn hyn wedi bod yn hynod o anwybodus, fel arfer gan saeson sydd ‘ddim yn gweld y pwynt’ neu yn dweud y byddai hyn yn creu dryswch (fel arwyddion Cymraeg ar ein ffyrdd?). Felly mae angen ymatebion gan bobl fyddai’n gwneud gwir ddefnydd o IDN.
Mae fwy o wybodaeth ar wefan Nominet. Mae’n bwysig eich bod yn darllen y papur ymgynghorol gynta a bod eich ymateb yn gwrtais gan y bydd yn cael ei gyhoeddi ar y wefan.
Mae gennych chi tan y 6ed o Fedi 2005 i ymateb.
Paranoia’r ffônau symudol
O’n i’n darllen stori bore ‘ma ynglyn a gwrthynebiad i osod mast ffôn. Fel arfer yn y byd modern mae pawb eisiau hwylustod technoleg newydd heb orfod mynd i’r drafferth o’i ddeall – felly mae’n amhosib i’r bobl yma gymeryd penderfyniadau call ynglyn a’r dechnoleg neu’r wyddoniaeth tu ôl iddo. Y dewis haws wrth gwrs yw dibynnu ar baranoia, storiau chwedlonol ac ansicrwydd.
Mae Elin Jones AC yn dweud
“Ry’n ni gyd yn gwybod ein bod ni’n gorfod troi ein ffonau symudol i ffwrdd wrth fynd i mewn i ysbytai achos gallen nhw effeithio ar offer meddygol”
Bolycs. Does dim tystiolaeth o hynny o gwbl a mae’r BMA a’r NHS yn gwybod hynny. Os oedd hynny’n wir fase rhaid banio’r pagers mae pob doctor ar alwad yn ddefnyddio. Un rheswm (call) dros droi ffonau i ffwrdd mewn ysbyty yw i roi ychydig o heddwch i’r cleifion a’r staff. Rheswm arall yw gorfodi pobl i ddefnyddio y ffonau cyhoeddus sydd wedi ei gosod mewn mannau arbennig lle nad yw’n amharu ar waith yr ysbyty – mae hyn hefyd yn creu incwm bach defnyddiol wrth i bobl ddefnyddio’r ffonau talu.
Mae Elin Jones yn parhau:
“Mae pobol yn dal i amau pa mor ddiogel yw’r mastiau. Rwy’n credu y dylen ni fod yn ofalus a pheidio â’u rhoi mewn man lle gall yr effaith fod yn wael.”
Yn ôl y rhesymeg gwirion yma nid oes unrhyw le yn saff i roi mast ffôn. Mae yna ddiffyg dealltwriaeth weddol bwysig weddol hanfodol yma – fe allwch chi roi mast ar ben mynydd ond mae hynny yn golygu fod rhaid iddo ddefnyddio pŵer uchel er mwyn cael cysylltiad da gyda’r ffonau, a mae’r ffonau yn gorfod gweithio’n galetach er mwyn danfon digon o signal yn ôl i’r mast.
Dyna pam fod y cwmniau ffonau symudol yn codi mastiau lleol mewn mannau lle mae’r defnydd mwya o ffonau – mae yn golygu fod hi’n bosib cadw pŵer y signal yn isel yn y mast ac yn y ffôn ei hun. Llai o’r ‘ymbelydredd’ cas yna felly (ond cofiwch peidio sefyll yn yr haul, mi gewch chi ddos o ymbelydredd llawer gwaeth o hynny).
Mae ffôn symudol yn cynnwys ‘mast’ bach hefyd er mwyn trosglwyddo gwybodaeth nôl i’r mast canolog. Ac wrth ddal hynny at eich clust, mae’r signal filoedd o weithiau yn fwy dwys na mae hi o’r mast.
Mae’r paranoia yma yn symtomatig o ddiffyg dealltwriaeth o wyddoniaeth nid yn unig gan y cyhoedd ond gan ein cynrychiolwyr etholiadaol hefyd. Mae sylwadau Elin Jones yn parhau yn y dull peryglus o wneud penderfyniadau ar sail ofn yn hytrach nag ar ffeithiau.
Dwi’n disgwyl ymlaen i weld pawb sy’n gwrthod mastiau ffôn am ddim rheswm heblaw “falle eu bod nhw’n beryglus” yn taflu allan eu ffonau symudol, a’u setiau teledu a radio a’u lloeren a meicrodon a’i gliniadur di-wifr. Mi fydd y byd llawer llai peryglus hebddynt yn wir…