Dim Cwsg Tan Cwrlwys

Postiwyd ar 22 Chwefror 2008 gan dafydd

Dwi’n mwynhau gwylio y gyfres Your Channel ar Aitsh Ti Fi Cymru Wêls ITV1 Wales sy’n edrych nôl ar 50 mlynedd o ddarlledu annibynnol yng Nghymru. Roedd y sioe ddiwethaf yn edrych ar ‘oes aur’ y sianel yn yr 80au pan roedd digon o arian ar gael i’r darlledwr (neu o leia’ roedd e’n oes aur i mi, gan fy mod i’n blentyn ar y pryd).

Mae digon o glipiau difyr wedi ymddangos yn y rhaglenni yn cynnwys nifer o raglenni Cymraeg HTV. Os ydych chi eisiau gweld rhaglenni llawn o’r gorffennol mae nifer ohonyn nhw ar wefan ITV Lleol Cymru.

Yr un gorau o’n rhan i yw Miri Mawr! Synnwch wrth weld Geraint Jarman yn blaco lan mewn perfformiad hynod wleidyddol anghywir o ddyn indiaidd. Syfrdanwch gyda’r dechnoleg chwyldroadol chroma-key. Ac wrth gwrs mae Calimero. Y gwesteion yn yr ogof yw Margaret Pritchard (lawr, fechgyn) a Huw Jones (a’i wallt). Gwych.

Ewch i adran 1973-79 – Miri Mawr yw’r olaf ar y rhestr a mae’n werth gwylio Ar y Lein hefyd.

Postiwyd yn Teledu, Y We | Sylwadau wedi eu Diffodd ar Dim Cwsg Tan Cwrlwys

Cracyr ‘dolig

Postiwyd ar 20 Rhagfyr 2007 gan dafydd

Tua adeg yma’r flwyddyn dwi’n gwneud fideo nadolig i ddarllenwyr ffyddlon y blog. Eleni cawn olwg fach ar beryglon teledu byw.

Nadolig Llawen!

Postiwyd yn Fideo, Hwyl | Sylwadau wedi eu Diffodd ar Cracyr ‘dolig

Voksenlia

Postiwyd ar 20 Rhagfyr 2007 gan dafydd

Dyma fideo treiglad amser hyfryd o Voksenlia yn Norwy. Yn hytrach na defnyddio camera gwe cyffredin mae nhw’n defnyddio camera digidol i gymeryd lluniau ansawdd uchel bob 25 eiliad. Dyma’r wefan lle allwch chi weld y lluniau a’r fideo diweddaraf a pori drwy’r archif luniau nôl i 2003.

Postiwyd yn Fideo, Y We | Sylwadau wedi eu Diffodd ar Voksenlia

Dwli daearyddol

Postiwyd ar 7 Rhagfyr 2007 gan dafydd

Dyma fapiau cartwnaidd o’r 19eg ganrif yn portreadu gwledydd fel personoliaethau ystrydebol – Cymru fel ‘Owen Glendowr’.

Postiwyd yn Y We | 1 Sylw

Ymbarel marw ar y ffordd

Postiwyd ar 7 Rhagfyr 2007 gan dafydd

Yn yr wythnos ddiwethaf mae wedi bod ychydig o antur wrth fynd i’r gwaith drwy’r gwynt a’r glaw. I ddechrau roedd rhaid penderfynu os oedd hi’n werth defnyddio ymbarel a brwydro yn erbyn y gwynt neu wisgo o’ch corryn i’ch sawdl mewn waterproofs. Wedyn mae angen osgoi yr holl byllau dŵr, lle mae’r gwteri wedi gorlifo. Mae gyrrwyr sy’n saff yn eu ceir clyd yn hoff o yrru ar gyflymder reit drwy ganol rhain er mwyn chwistrellu dwr ar draws cerddwyr ar y palmant.

Roedd y siwrne byr ar y trên yn reit syml, os oedd y gwasanaeth ar amser. Wrth gyrraedd orsaf Cathays wedyn roedd sialens arall, gan fod pwll o ddŵr wedi casglu wrth bont y rheilffordd. Felly i groesi’r bont roedd rhaid neidio ar cwpl o gerrig yng nghanol y dwr er mwyn cyrraedd y grisiau.

Bore ‘ma wrth gerdded lawr Plas y Parc roedd dinistr y nosweithiau cynt yn amlwg – dail, brigau, y mes a’r moch coed. Ond yn bennaf.. yr ymbarels marw yn gorwedd yn y gwter. Fe wnes i gyfri 14 o ymbarels rhacs wedi eu taflu o’r neilltu fel hen dedi bêr.

Roedd hi’n rhy wyntog i Olwyn Fawr Caerdydd neithiwr hefyd – fe gaeodd am wyth.

Postiwyd yn Bywyd | 1 Sylw