S4C mewn manylder uwch

Postiwyd ar 17 Hydref 2008 gan dafydd

Dyw e ddim yn syrpreis mawr, ond mae Channel 4/S4C wedi ennill slot ar gyfer teledu HD ar Freeview.

Beth sydd ddim yn amlwg yw sut y bydd S4C yn darlledu ei fersiwn nhw yn Nghymru yn ogystal a C4 – heblaw ein bod ni’n mynd nôl i’r hen ffordd o ‘opt-owts’ rhanbarthol. Wrth gwrs fe fyddai’n gwneud synnwyr i gael C4 HD a ‘S4C MU’ ar loeren hefyd erbyn yr amser hynny.

Fe wnaeth Tinopolis lot o ffys rhai blynyddoedd yn ôl fod eu cyfleusterau darlledu yn HD er nad oedd unrhyw fodd o ddarlledu rhaglenni fel Wedi 3 a Wedi 7 yn y fformat yna. Ydyn ni wir yn barod ar gyfer Angharad Mair mewn HD?

Postiwyd yn Newyddion, Teledu | Sylwadau wedi eu Diffodd ar S4C mewn manylder uwch

BBC Cymru oddi ar yr awyr

Postiwyd ar 28 Medi 2008 gan dafydd

Wel mae hyn yn esbonio pam fod sianeli’r BBC wedi diflannu o Freeview heddiw. O’n i’n dechrau poeni fod rhywbeth wedi digwydd i fy mocs digidol am fod pob sianel BBC wedi eu nodi yn ‘scrambled’. Er dwi ddim yn deall pam y ddylai problem yng Nghymru effeithio sianeli fel BBC News.

Mae’n ddefnyddiol iawn fod hi’n bosib gwylio’r sianel newyddion ar y we (ac yn fuan, sianeli eraill y BBC hefyd). Mae’r sianeli lawr ers 3 awr nawr felly mae’n rhaid nad yw’r broblem yn hawdd i’w ddatrys. Mae’r sianeli analog dal ar yr awyr ond wrth gwrs mi fydd y rhain yn cael ei troi i ffwrdd yn 2009-2010. Mae’n siwr fydd yna nifer o gwestiynau i’w gofyn ynglyn a’r drafferth, yn enwedig pam nad oes system wrth gefn er mwyn sicrhau fod rhyw fath o wasanaeth yn bodoli.

Postiwyd yn Radio, Teledu | Sylwadau wedi eu Diffodd ar BBC Cymru oddi ar yr awyr

Diwrnod y Glec fawr

Postiwyd ar 7 Medi 2008 gan dafydd

Dim ond 3 diwrnod sydd i fynd nes y bydd arbrawf yr LHC yn cychwyn yn CERN. Mi fydd yr arbrawf yn ail-greu y sefyllfa oedd yn bodoli ar ddechrau’r bydysawd (gyda ffracsiwn lleiaf o’r egni mae’n rhaid dweud).

Fydda’i ddim yn y gwaith y diwrnod hwnnw, felly dwi’n meddwl fydda’n dilyn y diwrnod gyda’r rhaglenni arbennig drwy’r dydd ar Radio 4.

A dyma fideo bach difyr i esbonio’r holl beth mewn 5 munud.

Postiwyd yn Fideo, Gwyddoniaeth | 3 Sylw

Geoffrey Perkins

Postiwyd ar 29 Awst 2008 gan dafydd

O’n i’n drist iawn i glywed fod Geoffrey Perkins wedi marw mewn damwain car yn Llundain. Roedd ei waith ar y gyfres radio Hitchiker’s Guide yn esiampl perffaith o sut i gynhyrchu drama fodern ar y radio, ac yn torri tir newydd o ran cyfuno cerddoriaeth ac effeithiau sain gyda’r deialog. Bu farw Douglas Adams yn llawer rhy ifanc a mi fydd marwolaeth cynnar Geoffrey Perkins yn golled mawr i fyd comedi hefyd.

Postiwyd yn Newyddion | 1 Sylw

Croeso i wallau gweinydd Cymru

Postiwyd ar 29 Awst 2008 gan dafydd

A peth arall… Dros y flwyddyn ddiwetha, mae gwefannau Croeso Cymru wedi cael ei ail-wampio yn raddol bach. Cwmni o Awstralia oedd yn gyfrifol am y brif wefan o Gorffennaf 2002 ymlaen ond nawr mae’r gwaith wedi mudo nôl i gwmni o Gymru. Mae hyn yn ‘beth da’.

Beth sydd ddim mor dda yw’r ffaith fod y wefan yn torri mor hawdd. Dyma ges i wrth chwilio am lety yng Ngheredigion:

Gwall Croeso Cymru

Braidd yn siomedig, yn enwedig gan fod datblygwyr cwmni Box o Gaerdydd yn arbennigwyr ar XML, yn ôl pob son.

Postiwyd yn Y We | Sylwadau wedi eu Diffodd ar Croeso i wallau gweinydd Cymru