TAW piau hi

Postiwyd ar 24 Tachwedd 2008 gan dafydd

Wel mae’r cwsmer cynta wedi bod ar y ffôn yn dweud “O na, mae’r cyfradd VAT yn newid, beth am ein siop ar lein?”, er does dim byd wedi ei gyhoeddi eto.

Dwi ddim yn gwybod os yw’r canghellor yn deall cweit faint o waith fydd angen i bobl newid eu systemau. Dyw’r gyfradd ddim wedi newid ers 1991, felly ychydig iawn o raglennwyr sydd wedi ystyried nad yw’r gyfradd dreth yn ‘gysonyn’ ond yn ‘newidyn’.

Gawn ni weld beth fydd y cyhoeddiad swyddogol ond dwi’n gallu gweld dipyn o ruthro prynhawn ‘ma i newid gwefannau i ddefnyddio’r cyfradd newydd. Fel mae’n digwydd mi fydd yn reit syml gwneud hyn ar gyfer y rhan fwyaf o wefannau gan fod y gyfradd yn cael ei storio mewn un man yn y cod. Mae nifer o’r gwefannau rydyn ni wedi adeiladu yn gorfod delio gyda trethi lleol yn America a mae cyfrifo hynny llawer mwy cymleth na unrhyw beth ym Mhrydain.

Dwi newydd wneud arolwg cyflym o’r gwefannau yn ein gofal ni a mi fydd angen newid tri ffigwr:

  • 17.5 -> 15
  • 1.175 -> 1.15
  • 7/47 -> 3/23 (dyma esboniad o’r ffracsiynau yma)
Postiwyd yn Newyddion | 1 Sylw

Oasis vs Take That

Postiwyd ar 31 Hydref 2008 gan dafydd

Dwi’n gyfrifol am letya gwefan sy’n gwerthu ticedi. Nawr mae’n wefan weddol brysur ond dim byd allan o’r arfer (allan o 150 gwefan dwi’n gynnal, mae e tua 15fed ar y rhestr). Yn yr wythnos ddiwethaf mae’n amlwg y bydd rhaid edrych eto ar letya’r wefan, o weld patrwm ei ddefnydd.

Yn gynta, fe aeth tocynnau gig Oasis yn Stadiwm y Mileniwm ar werth. Dim ond rhyw 50 tocyn oedd ar gael drwy’r wefan acwrth gwrs roedd pawb yn cyrraedd yr un amser yn benderfynol o gael ei archeb fewn. Fe ddaeth hi’n amlwg fod y wefan yn brysur iawn o 10 y bore ymlaen am tua awr (pan werthwyd y cyfan). Er fod y ‘llwyth’ ar y gweinydd yn reit uchel, fe wnaeth y system ymdopi a ro’n i’n meddwl mai dyna ddiwedd y peth. Wnes i nodi y byddai angen symud y wefan i weinydd mwy pwerus a roedden ni am drafod hynny gyda’r cwsmer.

Wythnos yn ddiweddarach, dyna’r un peth yn digwydd eto (am 9 y bore tro ‘ma). Fe fydde wedi bod yn neis cael cael gwybod o flaen llaw. Daeth hi’n amlwg yn eitha cyflym mai Take That oedd ar fai tro ‘ma. Roedd y wefan yn cael llawer mwy o geisiadau am y tocynnau yma, gymaint fel fod ein system awtomatig yn torri fewn er mwyn cyfyngu’r pwysau ar y gweinydd. Ar ôl ychydig o newidiadau bach i gyflymu’r wefan roedd popeth o dan reolaeth erbyn 10 ac erbyn canol dydd fe werthwyd y cyfan o’r nifer cyfyngedig o docynnau oedd ar gael drwy’r wefan.

Felly mae Take That yn curo Oasis, o leia ym mrwdfrydedd ei ffans. Erbyn y ‘tro nesa’ fydda’i wedi symud y wefan i weinydd arall sydd a ychydig fwy o le i ehangu iddo.

Postiwyd yn Technoleg | 1 Sylw

3 gair bach

Postiwyd ar 28 Hydref 2008 gan dafydd

Dwi’n dal i garu Frankmusik. Dyma fideo o gân ar ei EP newydd ‘3 Little Words’ gyda ysbrydoliaeth ‘Mawr’. Pop perffaith gan ddiawl golygus.

Postiwyd yn Cerddoriaeth, Fideo | 1 Sylw

Lluniau 360°

Postiwyd ar 28 Hydref 2008 gan dafydd

O’n i’n chwilio Google am bethau ar hap i wneud a Chaerdydd a des i ar draws lluniau 360° o Gaerdydd (dim byd newydd ond mae rhain yn rhai neis a wedi ei tynnu yn ddiweddar). Dyma lun o Heol y Brodyr Llwydion, lle dwi’n gweithio a mae dolenni i lefydd eraill yn y ddinas.

Ond i gyfuno gyda pwnc arall cyfredol, sef Scymraeg, sbotiwch yr arwydd anghywir yn y llun!

Postiwyd yn Lluniau, Scymraeg | 2 Sylw

S4C mewn manylder uwch

Postiwyd ar 17 Hydref 2008 gan dafydd

Dyw e ddim yn syrpreis mawr, ond mae Channel 4/S4C wedi ennill slot ar gyfer teledu HD ar Freeview.

Beth sydd ddim yn amlwg yw sut y bydd S4C yn darlledu ei fersiwn nhw yn Nghymru yn ogystal a C4 – heblaw ein bod ni’n mynd nôl i’r hen ffordd o ‘opt-owts’ rhanbarthol. Wrth gwrs fe fyddai’n gwneud synnwyr i gael C4 HD a ‘S4C MU’ ar loeren hefyd erbyn yr amser hynny.

Fe wnaeth Tinopolis lot o ffys rhai blynyddoedd yn ôl fod eu cyfleusterau darlledu yn HD er nad oedd unrhyw fodd o ddarlledu rhaglenni fel Wedi 3 a Wedi 7 yn y fformat yna. Ydyn ni wir yn barod ar gyfer Angharad Mair mewn HD?

Postiwyd yn Newyddion, Teledu | Sylwadau wedi eu Diffodd ar S4C mewn manylder uwch