Rhywbeth bach arall o’r archif nawr – trac gan Nid Madagascar, un o fandiau cynnar David Wrench. Mae’r trac yma wedi ei recordio oddi ar y radio, felly does gen i ddim llawer o fanylion amdano. O’n i’n arfer chwarae hwn yn aml circa 92/93, ac yn hoff iawn o’r steil ganu deadpan i gymharu a’r gerddoriaeth ddyrchafol. Dwi ddim yn gwybod beth yw enw cywir y gân – wnes i ei gofnodi fel “Trac 8″ ar y pryd ond o wrando eto, “Tragwydd” sy’n gwneud fwy o synnwyr. Sdim ots, dyma’r trac:

Nid Madagascar – Tragwydd [3.66MB]

Mae ‘Clarice’ wedi dechrau blog newydd Cymraeg/Saesneg gyda lluniau hyfryd iawn. Rhywbeth gwerth cadw golwg arni (drwy RSS wrth gwrs).

Ar Orffennaf 4ydd (5:52 GMT i fod yn fanwl) fe fydd y chwiledydd gofod Deep Impact yn danfon gwrthych bychan i daro mewn i gomed Tempel 1. Fe fydd hyn yn creu cwmwl o ddeunydd wedi ei daflu allan o grombil y comed a fe fydd y chwiledydd yn gallu dadansoddi’r elfennau sydd o fewn y cwmwl. Dyma’r tro cynta i unrhyw offer o’r ddaear allu edrych ar beth sydd o dan wyneb comed gan eu bod wedi eu gorchuddio gyda haenen o ia ‘budr’.

Mae gan y BBC animeddiad o’r hyn fydd yn digwydd ddydd Llun a mae NASA wedi creu animeiddiad cyfrifiadurol arbennig iawn o’r gwrthdrawiad.

Diweddariad: Gorffennaf 5 – Fe roedd yr arbrawf yn un llwyddiannus iawn a dyma lun gwych o’r comed gyda’r deunydd yn dod allan o’r comed yn cael ei oleuo o’r cefn gan yr haul.

Nôl yn yr 80au hwyr roedd Huw ‘Bobs’ Pritchard yn ganwr unigryw o dan yr enw Byd Afiach. Fe fyddai’n bosib ei ddisgrifio fel “un dyn a gitâr” ond gyda’r traciau ryddhawyd ar dâp mae yna gymysgedd o arddulliau o ganeuon acwstig syml i bop arbrofol.

Yn nechrau’r 90au fe roedd Bobs yn un o gyflwynwyr Hwyrach ar Radio Cymru gyda’i sioe Wplabobihocdw, a roedd ganddo sioe ‘Y Bocs’ ar S4C hefyd. Fe ‘laddwyd’ y Bobs (a Hwyrach yn gyfangwbl) gan nad oedd ei ffraethineb yn ddigon addas i agenda fasnachol newydd Radio Cymru.

Wrth dwrio drwy hen dapiau wnes i ddarganfod recordiad o sioe olaf y Bobs, yn 1992 dwi’n credu. Ar y pryd wnes i ddim sylweddoli pwysigrwydd yr achlysur a felly dim ond yr awr olaf gafodd ei recordio, a wnes i dorri allan rhai o’r caneuon. Ond mae’n werth gwrando arno beth bynnag. Mae’r recordiad yn agor gyda Tomos, mab Huw yn canu cân i ni. Mwynhewch!

Sioe olaf y Bobs [15MB]

Daeth newyddion digalon heddiw am swyddi yn mynd yn ffatri Sony ym Mhen-y-bont a Pen-coed. Mae’n anffodus fod y math yma o weithgynhyrchu yn un anodd i’w drosglwyddo’n araf i dechnoleg newydd – rhaid dechrau eto gyda offer newydd a sgiliau newydd i’w dysgu.

Ta beth, clip sain bach addas ar gyfer y newyddion yma oddi ar fflecsi disc “Dyddiadur Johnny R” (R-BEN 06, 1991). Dyw’r trac cyfan ddim gen i yn anffodus ond dyma flas.

“Sony Sandra, Sony Kevin“ [3.4MB]