Dwi’n eitha hoffi gwefan gymunedol ‘gwe 2.0′ Heddlu Gogledd Cymru. Mae’n edrych fel fod prif swyddogion a heddweision cymunedol yn cyfrannu i’r wefan. Yn anffodus felly, does dim cynnwys Cymraeg i’w weld yno, ddim hyd yn oed ar flog y prif gopyn (oedd ar gael yn Gymraeg yn wreiddiol dwi’n siwr).

O edrych ar yr ychydig o Gymraeg sydd ar y wefan, y gair wnaeth daro fi oedd ‘Porthol’. Pwy ddiawl sydd wedi cyfieithu hwn ‘te? Porth yw’r cyfieithiad arferol o ‘portal’, ond mae’n edrych fel petai rhywun wedi edrych yn ei Briws, gweld ‘porthol’, ac anwybyddu’r Anat sy’n golygu ei fod yn cael ei ddefnyddio yn y maes anatomeg.

Flin am y teitl. Nodyn bach i roi dolen i flog newydd am dechnoleg iaith gan staff Canolfan Bedwyr, ‘na gyd.

Mae’r wookie enwog wedi dechrau blogio. Hollol wallgo, ond doniol rhywsut.

Mae criw y cylch gwyddonias o’r maes wedi dechrau blog newydd – Bodio’r Bydysawd – ar gyfer eitemau newyddion, adolygiadau ar gyfer unrhywbeth arall yn trafod gwyddonias. Os ydych chi eisiau cyfrannu unrhywbeth, ewch draw a chliciwch ar y botwm Cysylltu.

Dwi wedi bod yn diodde cryn dipyn o sbam sylwadau ar y blog yma’n ddiweddar, er mae’n edrych fel ei fod wedi tawelu yn ddiweddar.

Mae’r blog wedi ei osod fel fy mod i yn gorfod cymedroli y sylw cyntaf gan unrhyw un – a mae hyn yn golygu fod pob neges sbam yn mynd i’r rhestr gymedroli yn syth. Mae hyn yn boen pan fo degau o negeseuon yn cael ei danfon gan fotiau sbam.

Ar ôl chwilio am y ffordd orau o atal sbam yn WordPress, a trio un neu ddau ategyn, mi ddes i ar draws Spam Karma 2. Mae hwn yn ategyn di-drafferth iawn a wedi bod yn effeithiol mor belled. Dwi hanner ffordd drwy gyfieithu y rhyngwyneb (gweinyddol) i Gymraeg – fan hyn.