Mae Google wedi defnyddio ei technoleg mapiau ar gyfer y blaned Mawrth – fe lansiwyd ddoe i goffau am y seryddwr Percival Lowell. Gwych.

Mae’r ymgyrch yn erbyn cardiau adnabod – NO2ID – wedi creu cân ac animeiddiad sydd yn ffordd eitha difyr o gael eu neges drosodd.

Flwyddyn nesa, fe fydd NASA yn danfon chwiledydd ‘New Horizons‘ i blaned Pluto (dwi ddim yn hoff iawn o’r bathiad Cymraeg – Plwton, sy’n swnio fel gronyn bach fel electron neu broton). Dyma fydd y siawns cynta erioed i gael golwg iawn ar y blaned bell.

Mi fydd NASA yn cynnwys rhestr o enwau ar y llong, sydd yn ffordd dda o godi diddordeb yn y prosiect fydd yn cymryd 10 mlynedd hir i gyrraedd Pluto – ychwanegwch eich enw!

Ar 20fed Orffennaf 1969 fe wnaeth dyn sefyll ar y lleuad am y tro cyntaf. Mae Google wedi addasu ei technoleg mapiau ar gyfer lluniau o wyneb y lleuad (mae yna syrpreis bach wedi guddio ynddo).

Ar Orffennaf 4ydd (5:52 GMT i fod yn fanwl) fe fydd y chwiledydd gofod Deep Impact yn danfon gwrthych bychan i daro mewn i gomed Tempel 1. Fe fydd hyn yn creu cwmwl o ddeunydd wedi ei daflu allan o grombil y comed a fe fydd y chwiledydd yn gallu dadansoddi’r elfennau sydd o fewn y cwmwl. Dyma’r tro cynta i unrhyw offer o’r ddaear allu edrych ar beth sydd o dan wyneb comed gan eu bod wedi eu gorchuddio gyda haenen o ia ‘budr’.

Mae gan y BBC animeddiad o’r hyn fydd yn digwydd ddydd Llun a mae NASA wedi creu animeiddiad cyfrifiadurol arbennig iawn o’r gwrthdrawiad.

Diweddariad: Gorffennaf 5 – Fe roedd yr arbrawf yn un llwyddiannus iawn a dyma lun gwych o’r comed gyda’r deunydd yn dod allan o’r comed yn cael ei oleuo o’r cefn gan yr haul.