daflog » Radio

Radio Cymru a iPlayer

dafydd — Thu, 16 Apr 2009 13:24:06 +0000

Mae’r BBC wedi cyhoeddi y bydd yr iPlayer yn dechrau cefnogi rhaglenni HD sydd yn newyddion da. Er fe fydd rhai o’r darparwyr rhyngrwyd yn dechrau cwyno eto y bydd hyn yn creu straen ar eu rhwydweithiau. Mewn gwirionedd y straen ar eu model busnes yw’r broblem a mae’n hawdd rhoi’r bai ar y BBC er fod YouTube yn gyfrifol am lawer mwy o’r ffrydiau fideo ar y rhwyd o fewn y deyrnas anunedig.

Mae yna dal waith i’w wneud ar yr iPlayer o ran darpariaeth Radio Cymru. Os ydw i eisiau gwrando ar Radio Cymru yn fyw ar-lein (nid mod i’n dymuno gwneud fel arfer), dwi’n cael y neges “To play please first install Real Player”. Beth? Dwi ddim eisiau dychwelyd i’r 1990au diolch yn fawr. Ydi Radio Cymru yn rhyw fath o ‘frawd bach’ sy’n cael ei esgeuluso o ran datblygiadau ynghlwm a’r iPlayer?

BBC Cymru oddi ar yr awyr

dafydd — Sun, 28 Sep 2008 13:50:33 +0000

Wel mae hyn yn esbonio pam fod sianeli’r BBC wedi diflannu o Freeview heddiw. O’n i’n dechrau poeni fod rhywbeth wedi digwydd i fy mocs digidol am fod pob sianel BBC wedi eu nodi yn ‘scrambled’. Er dwi ddim yn deall pam y ddylai problem yng Nghymru effeithio sianeli fel BBC News.

Mae’n ddefnyddiol iawn fod hi’n bosib gwylio’r sianel newyddion ar y we (ac yn fuan, sianeli eraill y BBC hefyd). Mae’r sianeli lawr ers 3 awr nawr felly mae’n rhaid nad yw’r broblem yn hawdd i’w ddatrys. Mae’r sianeli analog dal ar yr awyr ond wrth gwrs mi fydd y rhain yn cael ei troi i ffwrdd yn 2009-2010. Mae’n siwr fydd yna nifer o gwestiynau i’w gofyn ynglyn a’r drafferth, yn enwedig pam nad oes system wrth gefn er mwyn sicrhau fod rhyw fath o wasanaeth yn bodoli.

Radio curiad

dafydd — Tue, 07 Nov 2006 12:27:14 +0000

Dwi wedi bod yn arbrofi gyda darlledu ar-lein. Fel cam cyntaf dwi wedi agor gorsaf radio 24/7 i gerddoriaeth Cymraeg. Mae gen i gasgliad o mp3s Cymraeg wedi ei llwytho lawr o wefannau bandiau, rhai clasuron a rhai diweddar iawn. Wedyn wnes i wneud ‘rhestr chwarae’ o rhain i gyd – 8 awr a hanner i gyd. Mae’r rhestr yma yn chwarae ar hap drwy’r amser. Dim DJs crap, dim siarad gwag, jyst cerddoriaeth amrywiol.

Os ydych chi’n gwrando ar hwn, a dechrau syrffedu ar yr un traciau yn dod lan o hyd, mi fydd rhaid i fi chwilio am fwy o ffeiliau i ychwanegu i’r llyfrgell. I wrando ar y ffrwd mae angen chwaraewr mp3 a agor y cyfeiriad yma – http://radio.curiad.org:8000/byw.m3u ynddo.

Dwi’n gwybod fod y meddalwedd yma yn gweithio: WinAMP, XMMS, Windows Media Player. Mae rhai yn well na’i gilydd am ddangos manylion y traciau sy’n chwarae ar hyn o bryd. Hoffwn i wybod os ydych chi’n llwyddo gwrando ar yr orsaf drwy unrhyw feddalwedd arall.

Cyfeddach Cravos

dafydd — Sun, 28 May 2006 13:52:06 +0000

Os ydych chi ar ddihun yn gynnar iawn bore fory beth am wrando ar y ‘Steffan Cravos Orgy’ (swnio’n hwyl). Mae’r sioe yn cael ei ddarlledu ar orsaf radio prifysgol Harvard am 13 awr o 5am i 6pm (amser Cymru) felly fe fydd siawns i diwnio mewn drwy’r dydd. Mae’n bosib gwrando ar y we drwy wefan WHRB.

Seren radio

dafydd — Thu, 27 Oct 2005 14:29:20 +0000

Dwi wedi bod yn gwrando ychydig ar STAR Radio wythnos yma, gorsaf radio gymunedol yng Nghaerdydd. Mi fydd y sioeau i gyda ar gael yn fformat MP3 ar ôl eu darlledu. Mae nifer o bethau difyr yno ynghyd ac ambell … Continue reading →

Radio Digidol

dafydd — Fri, 30 Sep 2005 21:08:52 +0000

Mae’r BBC wedi cyhoeddi y bydd radio digidol (DAB) yn ehangu i dri drosglwyddydd newydd yng Nghymru, sef Blaenplwyf, Preseli a Llanddona, yn ystod y flwyddyn nesaf.

Mae’n bosib fod y sylw i radio digidol wedi lleihau yn y blynyddoedd diwethaf gan fod sianeli radio i’w clywed ar lein a thrwy setiau teledu digidol. Er hyn mae angen parhau i ehangu cyrhaeddiad DAB gan ei fod yn cynnig posibiliadau diddorol ar gyfer y dyfodol – sianeli arbennigol fel Radio Acen er enghraifft, sydd ar gael yn ardal Abertawe.

Cymraeg ar Radio 1

dafydd — Tue, 23 Aug 2005 13:57:48 +0000

Yn ôl cyfaill di-Gymraeg mae yna rhaglen Gymraeg ar Radio 1 heno. Ac ar ôl tsecio, oes yn wir mae ‘na, am 3am rhag dychryn gormod o bobl. Rhaglen Oneclick yw hi.

…militant rapper MC Slaver…

[ Gol. Mae hwn yn rhan o raglenni cywaith Voices, a mae yna fwy o bethau diddorol ymlaen yn ystod yr wythnos ]

Nant Gwrtheyrn

dafydd — Fri, 01 Jul 2005 09:25:50 +0000

Fe roedd rhaglen Open Country ar Radio 4 yn ymweld a Nant Gwrtheyrn yr wythnos yma. Rhaglen ddiddorol iawn a wnes i ddysgu tipyn nad oeddwn i’m gwybod am y Nant, fel y ffaith fod BP eisiau prynu’r safle yn wreiddiol er mwyn storio bareli olew yno!

Byd Bobs

dafydd — Thu, 30 Jun 2005 10:51:43 +0000

Nôl yn yr 80au hwyr roedd Huw ‘Bobs’ Pritchard yn ganwr unigryw o dan yr enw Byd Afiach. Fe fyddai’n bosib ei ddisgrifio fel “un dyn a gitâr” ond gyda’r traciau ryddhawyd ar dâp mae yna gymysgedd o arddulliau o ganeuon acwstig syml i bop arbrofol.

Yn nechrau’r 90au fe roedd Bobs yn un o gyflwynwyr Hwyrach ar Radio Cymru gyda’i sioe Wplabobihocdw, a roedd ganddo sioe ‘Y Bocs’ ar S4C hefyd. Fe ‘laddwyd’ y Bobs (a Hwyrach yn gyfangwbl) gan nad oedd ei ffraethineb yn ddigon addas i agenda fasnachol newydd Radio Cymru.

Wrth dwrio drwy hen dapiau wnes i ddarganfod recordiad o sioe olaf y Bobs, yn 1992 dwi’n credu. Ar y pryd wnes i ddim sylweddoli pwysigrwydd yr achlysur a felly dim ond yr awr olaf gafodd ei recordio, a wnes i dorri allan rhai o’r caneuon. Ond mae’n werth gwrando arno beth bynnag. Mae’r recordiad yn agor gyda Tomos, mab Huw yn canu cân i ni. Mwynhewch!

Sioe olaf y Bobs [15MB]