Daeth sengl nadoligaidd drwy’r post o label R-Bennig. Yn ôl y datganiad mae R-bennig wedi ryddhau dros 30 o deitlau (mor belled) flwyddyn yma a nawr dyma sengl (R-BEN 092) i gloriannu’r cwbl. Ryw fath o drip meddw drwy gêm darts yn y dafarn leol yw hwn.

Aelwyd Anal Arts – Gêm On Hogia! [2.72MB]

Mae Chris wedi fy herio i fynd ati i eto ail-gymysgu eu eiriau doeth. Wel dyma ymgais arall, mewn un awr o whare’ ambyti. Mae’r samplau yn dod o bost diweddaraf Chris wnaeth e tra’n gyrru i’r gwaith. Mae’r lŵps cerddorol yn dod o drac ‘Yr Oerfel Fawr’ (Chris talentog arall – mae fwy o mp3au ar ei wefan).

Cymal 3 – CC2 [1.95MB]

Eto heno o’n i’n teimlo fel chwarae gyda sampls felly wnes i orffen rhywbeth wnes i ddechrau ychydig wythnosau yn ôl sef ail-gymysgu Teithiwr gan John Grindell. Dyna gyd dwi wedi wneud yw torri allan ychydig ddarnau allan a’i ail-drefnu felly sdim byd clyfar yma.

Cymal 3 – Teithiwr ‘93 (C3 ‘05 mics) [5.49MB]

Dwi’n mwynhau darllen a gwrando ar flog Chris Cope yn fawr iawn. Wrth ddal i fyny gyda rhai o’i negeseuon heno wnes i ystyried pa mor sampladwy yw ei ‘bostiau clywedol’, yn enwedig gyda’r newid sydyn o acen Cymraeg i saesneg Americanaidd.

Felly es i chwarae am ryw awr i greu trac bach syml munud o hyd. Dyma fe ‘te:

Cymal 3 – CC1 [1.16MB]

Dwi am fynd nôl i 1993 gyda tri trac gan ’swynwr y synthau’ (y Rick Wakeman Cymraeg)… ie, John Grindell. Wnaeth e ryddhau caset ar label Sain y flwyddyn honno o’r enw Celt (C2066a) sydd yn gampwaith o chwarae synth prog-rocaidd. Yndi mae’n gawslyd ac yn anffasiynol ond dyna pam dwi’n ei hoffi. Mae yna rywbeth arbennig am lais John hefyd sydd yn gyfuniad perffaith gyda’r synth.

Mae nodiadau defnyddiol ar y clawr felly sdim rhaid i fi wneud dim – mae’r gân gyntaf Dianc yn “gân yn sôn am y pwysau ar y Cymry sy wedi’i osod arnom gan y Saeson a’r Saesneg… mae’r straen weithiau’n mynd yn ormod.. ac mae’n hawdd meddwl am ddianc yn lle wynebu’r problemau”

Yr ail gân (yma nid ar y caset) yw Y Teithiwr ‘93 (vocoder ahoi) – “cân ysgafn… yn sôn am ddyn sy’n gofyn i ferch ymuno â fo yn ei long ofod a theithio trwy’r bydysawd“. Ffar owt..

Y drydedd yw’r gân wych Yr Ynys sy’n para am 13 munud (ond dim ond 4 munud dwi wedi ei roi yma) – “mae’r gân gonsept hon yn dangos dyheadau’r cyfansoddwr am ddyddiad roc progresif y saithdegau”

Dianc [6.11MB]
Y Teithiwr ‘93 [4.58MB]
Yr Ynys [5.59MB]